الله يولع في بلال فضل وصحفي الاحرار و شيخ الغفر
من الاخر كده وبدون مقدمات وبلا تردد قررت الابتعاد عن التدوين بعد اللي حصل ليا بتسألوا ايه اللي حصل ...
نخش في الموضوع مش عارف أكتب الموضوع بالعامية ولا بالفصحي أقولكم نخلية بالعامية الفصحي حاجة كدة زي الفرانكو اراب بتاعة الجيل الطحن بتاع اليومين دول
حضر شيخ الغفر في البلد تبعي وجرجرنى علي الدوار بتاعه بصحبة الغفر تبعه .
وسوف اشرح لكم كافة الاحداث يمكن تعذروني .............
فبعد اقتياد شيخ الغفرلي هو واعوانه وجه لي سؤالا مباشرا وواضحا وضوح الشمس فى كبد السماء .
انت مال اهلك بالتدوين ياروح امك ؟!!
فقلت له انا مواطن شريف ولي حقوق وواجبات واحيط علمك الي ان اقتيادي بهذه الصورة غير قانوني وأحب اقولك أن البلد فيها قانون و حقوق انسان بالاضافة الي انني صحفي واقتحام منزلي بدون اذن مسبق من النيابة سوف يقضي علي مستقبلك المهني والأهم ان محدش عمل معايا كدة قبلك ولازم تفهم ان سيرة أمي غير مسموح لأي شخص بالكلام عنها بالشكل ده كونها متوفاة منذ ثلاثين عاما ولا اقبل لشخص جاهل مثلك يخوض فى سيرتها خيرا او شرا.
فرد علي قائلا حقوق انسان اية وهباب اية يا روح امك اللي ماتت ويدوب شاور على الغفر وقال : روقوة!!
زي مايكونوا لقوا حاجة يفشوا غليلهم فيها و طاخ طيخ طاخ طوخ !!
أى أى يا عيني أي يا قفاية أي يا ظهري !!!
وبعد ساعة مرت علي دهراً كما يقولون اذاقونى فيها العذاب بكافة الوانه وصفاته قلت مضطرا خلاص أنا قصدي غير مسموح لحد غير سيادتك بالحديث في سيرة امي ماشي وبعدين انت ابو التعليم والثقافة والتنوير في الناحية كلها انا جاهز ياباشا لكل اوامر جنابك ومستعد أعترف بكل اللي عايزني أعترف بيه بس قولي احلام جنابك اية؟!! عرفت دلوقتي ليه كل اللي بيدخل الحبس بيكون اعترافه بالجريمة اللي ارتكبها كامل وبالتفاصيل زي ماهو مكتوب في كل محاضر الشرطة
فطلب من أعوانة ماكينة حلاقة وجاب دماغى زيرو يعنى رأسى أصبحت مثل قفاية بالضبط وراح شيخ الغفر الله يولع فيه هو واللى معاه قايلى : احنا جايبينك هنا النهاردة يا شحط علشان ناخد شوية معلومات منك وطبعا معندكش مانع ؟!!
ابدا ياباشا انا رهن اوامر معاليك !!
فقالي انت تعرف بلال فضل يا شحط ؟!
طبعا هو ا لمؤلف بتاع هيمة مسلسل عبلة كامل واحمد رزق
فقال انت اهبل يلا احنا هنجيبك هنا علشان تقول الكلام اللى زى وشك ده واشارة واحدة من ايده اللي تنشل وعاديك طاخ طيخ طاخ !!
خلاص فهمت يا باشا بلال فضل دة هو اللي حرض العيال بتوع 9 ابريل علي الشغب وهو كمان المخطط الرئيسي لكافة الاضرابات التي تحدث فى البلد وهو اللى بيحرض أصحابها على المطالبة بحقوقهم المسلوبة
واية حكاية الكلام اللي بيكتبه الواد سو في مدونتة ؟
قصد سعادتك سو يا سو حبيبي خاطفوه ؟!
وكالعادة اشارة واحدة وطاخ طيخ طاخ !!
حاضر يا ياباشا هفتكر اهوه كفاية ضرب ربنا يكفيك شر البهوات بتوعك و ايديهم الطرشة اللي هرت قفاية ,وورمت خدودي وانتفخت بسببها عنيا !!!
وبعدين يا باشا هقول اية للعيال وامهم ابوكم طلع فشار فقد كنت افتخر امامهم انك صديقي وبجلس معك على المصطبة !!
طب عارف الواد خال ولاد اختة اللى اسمة احمد هباب الصباغ ؟
ايوا ياباشا عارفة وعارف ولاد اخته واخته نفسها وجوزها وكلهم من المأجورين اللي بينفذوا أجندة خارجية حلوة أجندة خارجية دي صح حلوة بذمتك دي هتخلي الاعتراف تمام
انت هتهزر يا روح أمك ... بس والله حلوة اكتبها يا شحط مشيراً الي الكاتب اللي بيظبط المحضر
واخبار الواد بتاع مدونة شخابيط اية ؟
الواد دة طلع احمد ابنى يا باشا قاعد يشخبط ليل ونهار وأمه بتصوت منه قال اية قاعد يرسم والجيران بتشتكي منه ومن صويت والدته طول النهار ياريت تاخدوه وتخلصونى منه !!!
طب تعرف الواد بتاع مدونة ميت ؟!!
ايوا هو السبب في انتشار امراض السرطان التي تحصد ارواح الاطفال قبل الكبار بعد ان اغرق البلد بالمواد المسرطنة والقمح الفاسد .
طب تعرف البت لماضة ؟
ايوه عارفها هي البت ام لسان زالف والحشرية وهي ساكنة علي قمة الشارع بتاعنا اللي كل ما يجي حد يبيع سمك او مواد غذائية مسممة والتي يعتمد عليها الغلابة في الشارع تتلامض معاهم وتقعد تصيح فين المسئولين فين بتوع الصحة والامن الغذائي وحاجات كتير كدة مابفهمهاش!!
واية حكاية الواد بتاع مدونة موطاهر ؟
موطاهر دة صاحب خالي طاهر وزمانة معاة في الغيط بيروي الارض بمياة الصرف الصحي اللى بتلوث الزرع وتصيب المزارعين بكافة الامراض المستوطنة !!
طب عارف الواد بتاع مدونة الوعي المصري ؟
ايوة عارفة هو اللي بيجي البلد علشان يوعي الناس من البلهارسيا وانفلونزا الطيور والخنازير ومن الفشل الكلوي والالتهاب الكبدي الوبائي اللي بياكل كبد الاهالي !!!!
وعلاقة أهلك اية بالبت نوارة نجم بتاعة جبهة التهييس ؟
بصراحة سعادتك دي بالذات انا متغاظ منها لانها السبب الحقيقي وراء الانقطاع المستمر للكهرباء وعياط العيال الصغيرة فى القرية وحرق الاجهزة الكهربائية والاهم من ذلك انها السبب في حالة التهييس اللي البلد فيها خاصة بين الشباب بتوع البانجو وحبوب الصراصير والنمل والتى انتشرت بشكل مفزع بين العيال دول اللى بيضربوا الحاجات دي وبعدين يمشوا في الشارع يهيصوا أقصد يهيسوا مش دة قصد سعادتك بموضوع التهييس؟
طب قولي اية حكاية مجمع منال وعلاء للمدونات ؟
ياباشا ولاد الهرمة دول هما اللي بيشخرموا في صحة الناس وهما اللي بيستوردوا الاغذية الفاسدة وبيوزعوها من خلال المجمعات بتاعتهم !!.
وفجأة قالي شيخ الغفر شوف بقة ياروح امك احنا عاوزين اخبار العيال بتوع التدوين دول اول باول!!
فقلت له ياباشا ارجوك اعفيني من الحكاية دي انا راجل عديت الاربعين بعامين ومستحملش البهدلة فهم جميعا شباب صغاروأقولك
اللهم ولع في بلال فضل ونوارة نجم وصحفي الاحرار من زملائي الذين علموني حكاية التدوين دي وسو والواد خال ولاد اختة ولماضة وموطاهر وكل اللي على شاكلتهم !!.
راح زعلان وقايلي انتا هتتعوج تاني ياروح امك ؟!
كهربوة طاخ طيخ طاخ طيخ !!
لآلآ خلاص يا باشا انا عارف كل شئ عن العيال دول بلاش كهربة وحياة رحمة امك الغالية و ربنا يحرق المدونين دول ويحرق اليوم اللي فكرت اعمل فية المدونة الهباب دي!!
وقال أية رايح اسميها تفاؤل
وهنا فقط سابوني وطبعا انتم هتقولوا خلاص بقي وواصل الكتابة مدام سابوك وأهي علقة تفوت ولا حد يموت أقصد يتوقف عن الكتابة
لكم حق ما أنتم متعرفوش ان الموضوع دة كان مجرد حلم وبعد ما صحيت من النوم أصبت بصدمة عصبية خوفا من انقلاب الحلم الى حقيقة فقد تم نقلى للوحدة الصحية واعطانى معالى الدكتور حقنة مهدئة
وعلي طول رحت جاري علي شيخ الغفر فى البلد تبعى وبايس ايده وش وضهر حتى اثبت له اننى من اخلص رجاله !!!!
بلا تدوين بلا هباب والبركة فى الشباب الصغار اللى يستحملوا أيادى الغفر!!
