شباب اليوم شباب مظلوم تعيس مهموم بأحلامه
آماله كتير طريقها عسير عنيدة وصعبة أيامه
شبابنا شريد فى دنيا وحيد بعيد عن كل أوهامه
لمين هيروح بهمه يبوح يداوى جراحه وآلامه؟!
شبابنا ضحية مش جانى.. مشاكله كتيرة بيعانى
تقولش فى حرب بيحارب؟.. ولا نافع كدة نضاله!
ولا قادر يقول الآه.. غلاء وبطالة مش سيباه
ولو محظوظ وله واسطة.. يا سعده أكيد هنياله
شباب اليوم شباب مكبوت.. طموحه بيضيع آماله بتموت
إذا اتكلم هُس، سكوت.. ويلقى مصيبة جياله!
ليه يا وطن بنهون عليك؟.. أمل الشباب ده بين إيديك
روحه وحياته كله ليك.. إن اشتكيت حالك ده حاله
فاكر حروب أيام زمان؟.. مين رجّعك تانى للأمان؟
قول الشباب ولا إنت ناسى.. تيجى بعدها تظلم عياله؟!!
=====================
